Rev 5 | BEF | STEP | To sekele mamu'a hiti kefa hisalo minolata nohina ai yahi lamaga'aga kelebe gi'ahana pepa li'ehigo bu go'ohube. To ana pepa ya'ma gupisa'aga to okaba'aga fayahi ni'igo bu go'ohuna. To ana pepamo naga'atu 7 mu tifite sa gi'ahana.

Revelation of John 5

Sipisipi nala'a hiti fayaha pepa sa gite mele'ahana bu go'ohuna

1 To sekele mamu'a hiti kefa hisalo minolata nohina ai yahi lamaga'aga kelebe gi'ahana pepa li'ehigo bu go'ohube. To ana pepa ya'ma gupisa'aga to okaba'aga fayahi ni'igo bu go'ohuna. To ana pepamo naga'atu 7 mu tifite sa gi'ahana. 2 To amuya'a hiti agelo mone bu go'ohube. Ai ya'ma ka sipi nogo'a ma luto lu'ehina: Ki'afu bati huto minalina bouba pepamofihi naga'i gulu foto li paka soloto leka senogo bati hilina ni'ibe? 3 Ya luto lulago kokulumagu to metoga to me'mofihi komopa'agu ema moneuba ho tito pepa ya'ma kupa'agu paka soto bu galina suhi huto meni'ibe. 4 Ya hulago pepa ya'ma paka soto bu galina suhi huto nohina bo sa sa huto lamana bo mone menohigo ya'mu komopa'nigu keta higo sipi yibi nohube. 5 Yibi nohugo olopa kaba bona'i luga'amagihi enalitogati moneuba ma luto lu nimi'ehina: Yibi mehubo. Bu gobo. Yutaha nagaluguti luba kala laeoni tegi huto mino'ehina bo huto hu'ehina ai Tebitihi yagapana'a ya'ma Satahi luba'a be ligiloto pepa naga'a 7 li sala ke'ahana ya'ma aigo li paka soto bu galina'mu yabe.

6 Ya luto ligo nani nubu ego saga huto sekele mamu'a hiti kefa ni'inaga kene'i amuya'a hiti loebe loebe to olopa bona'i luga'a enali folagaha'anigu sipisipi yaga mone nala'a keye lu fili'ahana ya suhi huto ho tito nominana bu go'ohuna. Komu'a 7 mino'ehina. To bu'a ana suhi luto 7 mino'ehina ya'ma Hu'mamofihi meha'a 7 ni'ina sikalafu'i ai ya'ma ho lifigo me'i nekisa mokisa'aga mino baga ito nohina bomofihi ai legege huto nohina. 7 To sipisipi nala'auba buto sekele mamu'a hiti kefalo nohina bomofihi yahi lamaga'agati ya'ma kelebe gi'ahana pepamo ya'ma li'ehina. 8 Kelebe gi'ahana pepamo noligo amuya moloto minolata kene'i loebe loebe to olopa kaba bona'i luga'a 24 sipisipi nala'amofihi maha'aluga bite lipi emi'ahana. Ya hilete enali nama lilibe lite ilata nasana napa gita legitana ya'ma li'ehite to lape'i mone ya'ma golitu lolo hi'ahana hiti eto eto hite lite mine'ahana. Tu'a hiti mafeleke mamufa gilata nehana lapelugu bai toto ni'ito yanauba mono bona'magihi Hu'mamofitoga nunumu lilata nehanamofihi babeyafa suhi huto ni'ibe. 9 Nama kosaba'i mone ma lite li'ahana: Kai bati bo nohatagi kelebe gi'ahana pepamo lito naga'i gulu foto li paka salata babeyafa huto nohane. Kai kahago filito kai golahakatu bona'i asagatoga fato fato bona'i to fato fato enonogo hiti to fato fato enugufa hiti to fato fato metoga bona'i mina fito enele'mo fato fato huto Hu'ma nohinaga enele'mo molo'ahatamo ni'ibe. 10 Hu'mamofihi afotifihi kele kele'i hi etalabe luto ai mono ka'alo mamufa gilata nehana bona'i enele'mo kapo'alugu molo'ahatamo ni'ibe. Enele'mo mololatogo metoga kaba hite minete enigihiti bona'i lolo hite minalune'mu habe.

11 Aku'i nubu bu go saga huto bu go'ohuna. Ya'ma agelo samahi tite silaga'magihi enabagaguti kaga silaga'i keheli'ohuna. Enali ya'ma 100 milioni to tauseni to tauseni mine'ahana. Enali ya'ma sekele mamu'a hiti kefa hisalo to kene'i amuya moloto minolata loebe loebe nehana to olopa bona'i luga'a neminana hepato fi bego hite minete, 12 ka sipi lite nama ma lite li'ahana: Sipisipi nala'a kohe tete ho fili'ahana ai bati nohinamo ni'igi aitoga kaba huse'na hiti to babu mina'a hiti to keheli fe lulata to amuya lilina legege huto li emilo. To bona'i yege yege'magi fokehi lite ai'a gi'a le'mo ho tite liyafa lilete fana meha'a huto hilibe lite lilete aitoga enegelo bi emilo.

Ana nama lite li'ahana. 13 To nani silaga kene'i kokulumagu ni'ina nasana to melugu ni'ina nasana to me'i komopa'agu ni'ina nasana to hege nagami'i komopa'agu ni'ina nasana to me'i fato fato ni'ina nasana yege yege'magi ma lite nama nelago keheli'ohuna: Sekele mamu'a hiti kefa hisalo minolata nohina to sipisipi nala'a nohina etali kumu enofokehi hete etigi'atiti le'mo ho tilete fana meha'atiti huto huto hibe, mino bati hulatana to amuya etalitoga minomo buto mino bai toto minalube'mu hibe.

14 Ya lite lilago kene'i amuya minolata loebe loebemagi kaga nona'a li epite: Lama'naka yabe lite lilago olopa kaba bona'i luga'a enali enalapusa fi etimite etalitoga yege fi'ahana.